भुटानमा विपक्षीको सानदार जित

थिम्पु (एजेन्सी), असार ३० - भुटानको दोस्रो संसदीय निर्वाचनमा विपक्षी पिपुल्स डेमोक्रेटिक पार्टी (पीडीपी) ले सानदार जित हात पारेको छ । छिरिङ तोब्गे नेतृत्वको उक्त पार्टी ४७ मध्ये ३२ स्थानमा विजयी भएको हो ।

सन् २००७ मा भएको पहिलो निर्वाचनमा उक्त दल दुई सिटमै खुम्चेको थियो । चुनावअघिसम्मका प्रधानमन्त्री जिग्मे वाई थिन्ले नेतृत्वको ड्रुक फुन्सुम छोक्पा -डीपीटी) ले झन्डै सबै ४५ स्थान जितेको थियो । यसपटक ऊ १५ सिटमा झरेको छ । शनिबार सम्पन्न निर्वाचनमा चार लाख २९ हजार मतदाताको ८० प्रतिशत भोट खसेको थियो ।

भुटानमा दुई दलीय संसदीय अभ्यास छ । निर्वाचनसमेत दुई चरणमा हुन्छ । यसअघि ३१ मेमा सम्पन्न पहिलो चरणमा भाग लिएका पाँचमध्ये तीन दल खारेज भएका थिए । तीमध्ये एउटाले सबै क्षेत्रमा उम्मेदवार पुर्‍याउन नसकेपछि पहिलो चरणको निर्वाचनमै भाग लिन पाएन । अरू दुई दल तेस्रो र चौथो भएकाले पहिलो चरणबाटै बाहिरिए ।

दोस्रो चरणको निर्वाचन हुनु ११ दिनअघि भारतले भुटानलाई पेट्रोलियम पदार्थमा दिँदै आएको सहुलियत बन्द गरेको थियो । त्यसको असर निर्वाचनमा स्पष्ट देखिएको छ । सत्तारूढ दल डीपीटीले लज्जास्पद पराजय बेहोरेको छ ।

नेपालीमूलका ७ निर्वाचित भुटानमा नेपाली मूलका सात जना संसद्मा निर्वाचित भएका छन् । ती सबै पीडीपीका उम्मेदवार हुन् । निर्वाचित हुनेमा दक्षिणी भुटानको साम्ची जिल्लाबाट मात्र चार जना छन् । तिनमा रितुराज छेत्री, एमके छेत्री, डीएन ढुंगेल, टेकबहादुर सुब्बा, नवीन दर्लामी, योगेश तामाङ र गोपाल गुरुङ छन् ।

भुटानमा विपक्षीको सानदार जित